అనిరుధ్‌-కావ్య పెళ్లి రిసెప్షన్‌.. మోదీ, విజయ్‌లను ఆహ్వానించిన మారన్‌ దంపతులు

ప్రముఖ సంగీత దర్శకుడు అనిరుధ్‌ రవిచందర్‌, సన్‌ టీవీ గ్రూప్‌ అధినేత కళానిధి మారన్‌ కుమార్తె కావ్య మారన్‌ వివాహ వేడుకపై ఆసక్తి పెరుగుతోంది. ఈ జంట వివాహ రిసెప్షన్‌కు రావాలంటూ ప్రధానమంత్రి నరేంద్ర మోదీ, తమిళనాడు ముఖ్యమంత్రి విజయ్‌లకు ఆహ్వానం అందింది. ఇందుకు సంబంధించిన ఫొటోలు సోషల్‌ మీడియాలో వైరల్‌గా మారాయి.

కావ్య, అనిరుధ్‌ వివాహ రిసెప్షన్‌కు రావాలని కోరుతూ కళానిధి మారన్‌ ప్రధాని మోదీకి ఆహ్వాన పత్రిక అందించారు. కాగా, ఈ కార్యక్రమంలో అనిరుధ్ తల్లిదండ్రులు కూడా పాల్గొన్నట్లు సన్‌ న్యూస్‌ వెల్లడించింది. అయితే ఈ భేటీకి సంబంధించిన ఫొటోల్లో అనిరుధ్‌ కనిపించలేదు.

సీఎం విజయ్‌ను కలిసిన జంట
తమిళనాడు ముఖ్యమంత్రి విజయ్‌ను కూడా కళానిధి మారన్‌ కలిశారు. కావ్య, అనిరుధ్‌ రిసెప్షన్‌కు ఆహ్వానించారు. ఈ సందర్భంగా తీసిన ఫొటోలను సన్‌ న్యూస్‌ సామాజిక మాధ్యమాల్లో పంచుకుంది. ఇందులో అనిరుధ్ కూడా ఉండడంతో ఈ చిత్రాలు నెటిజన్ల దృష్టిని ఆకర్షిస్తున్నాయి.

నవంబరు 21న రిసెప్షన్‌
తెలంగాణ ముఖ్యమంత్రి రేవంత్‌ రెడ్డి అక్టోబరు 16న ఈ వివాహ రిసెప్షన్‌ వివరాలను వెల్లడించారు. చెన్నైలో నవంబరు 21న వేడుక జరగనున్నట్లు తెలిపారు. కావ్య తల్లిదండ్రులు కళానిధి మారన్‌, కావేరి మారన్‌ హైదరాబాద్‌లోని జూబ్లీహిల్స్‌లో రేవంత్‌ రెడ్డిని కలిసి ఆహ్వాన పత్రిక అందించారు.

గ్రీస్‌లో పెళ్లి?
అనిరుధ్‌, కావ్య నవంబరు 11న గ్రీస్‌లో వివాహం చేసుకోనున్నట్లు కొన్ని మీడియా కథనాలు పేర్కొన్నాయి. అయితే ఈ పెళ్లి తేదీ, వేడుకల వివరాలను అనిరుధ్‌, కావ్య అధికారికంగా ప్రకటించలేదు.

అనిరుధ్‌ ప్రముఖ సంగీత దర్శకుడిగా గుర్తింపు పొందారు. ‘లియో’, ‘ఇండియన్‌ 2’, ‘కూలీ’, జైలర్‌ వంటి హిట్‌  చిత్రాలకు సంగీతం అందించాడు. కావ్య మారన్‌ సన్‌ టీవీ నెట్‌వర్క్‌ ఎగ్జిక్యూటివ్‌ డైరెక్టర్‌గా బాధ్యతలు నిర్వహిస్తోంది. ఐపీఎల్‌లో సన్‌రైజర్స్‌ హైదరాబాద్‌ జట్టుతోనూ ఆమెకు అనుబంధం ఉంది.
.